അനുഭവങ്ങൾ പാളിച്ചകൾ. എന്റെ ആദ്യത്തെ നായ, പിന്നെ കുറെ തെരുവുനായകളും. (ബാല്യകാല സ്മരണകൾ-- 11)

                  ഞാൻ ഏഴാം ക്ലാസിൽ പഠിക്കുമ്പോൾ വീട്ടിൽ ഒരു നാടൻ നായയെ സ്കൂളിനടുത്തുള്ള ഒരു ചായ കടക്കാരന്റെ വീട്ടിൽ നിന്ന് കൊണ്ടുവരികയുണ്ടായി. മുലകുടി മാറുന്നതിനു മുമ്പേ കൊണ്ടുവന്നതുകൊണ്ട് പല ദിവസങ്ങളിലും രാത്രിയും വെളുപ്പിനും കരഞ്ഞുകൊണ്ടിരിക്കും. കരച്ചിലു കേട്ട് വെളുപ്പിനും രാത്രിയും കഞ്ഞിവെള്ളവും പാലും കോരി കൊടുത്താണ് മുലകുടി മാറ്റിയത്.
        നായ വലുതായി സുന്ദരനായി.മീനും ഇറച്ചിയും വാങ്ങി കൊടുത്തു. ഒരു ഇല അനങ്ങിയാൽ കുരയ്ക്കും.

  ഒരു ദിവസം പട്ടിപിടുത്തക്കാർ വന്നു. അവരുടെ കയ്യിലെ കുടുക്ക് കണ്ട് എന്റെ അയൽവക്കത്തെ വീട്ടിലെ നായ പാഞ്ഞ വഴി കണ്ടില്ല. എന്റെ നായ ആരാടാ അനുവാദമില്ലാതെ തൊടിയിലേക്ക് വരുന്ന തെന്ന് ചോദിച്ച് കുരച്ച് ധീരനായി മുന്നോട്ട് ചാടി. പട്ടിപിടുത്തക്കാരുടെ കെണിയിൽ അവൻ പെട്ടു. കഴുത്തിൽ കുടുക്കിട്ട് നായ അവരുടെ കയ്യിലായി.

   ഞങ്ങൾ കുട്ടികൾ എന്ത് ചെയ്യണമെന്നറിയാതെ നിസ്സഹായരായി. പട്ടിപിടുത്തക്കാരോട് എന്തെങ്കിലും പറയാനുള്ള ധൈര്യം ഞങ്ങൾക്കുണ്ടായില്ല. പട്ടികളെയെല്ലാം കൊണ്ട് അവർ പടിഞ്ഞാറു ഭാഗത്തേക്ക് പോയി. ഈ കാഴ്ച കണ്ട് ഞങ്ങൾ അന്തം വിട്ടു നിന്നു.

              ഒരു അര മണിക്കൂർ കഴിഞ്ഞപ്പോഴാണ് അച്ഛൻ വന്നത്. അച്ഛൻ എത്തിയതും നായയെ പിടിച്ച കാര്യം പറഞ്ഞു. അതിന് വളർത്തുനായയെ എന്തിന് പിടിക്കണം എന്ന് പറഞ്ഞ് അച്ഛൻ ദേഷ്യപ്പെട്ട് പടിഞ്ഞാറു ഭാഗത്തേക്ക് നടന്നു.

        അവിടെ ഒരു വലിയ പറമ്പിൽ നായയെല്ലാം കുത്തിവെച്ച് അവർ കൊന്നിരുന്നു. ഞങ്ങളുടെ നായ് വളർത്തുനായയാണെന്നു മനസിലാക്കി അവർ അത്രയും നേരം ആരെങ്കിലും വരുമെന്ന് കരുതി കാത്തിരുന്നു. ആരെയും കാണാതിരുന്നതുകൊണ്ട് ഇപ്പോൾ കൊന്ന തേ ഉള്ളൂ എന്ന് പട്ടിപിടുത്തക്കാർ പറഞ്ഞു. ആ നായയുടെ മരണം ഇന്നും എന്നെ വേദനിപ്പിക്കുന്നു. ഞങ്ങളുടെ വളർത്തുനായയെ പിടിക്കല്ലേ ... വിട്ടുതരണം എന്ന് പറയാൻ പോലും അന്ന് കഴിഞ്ഞില്ലല്ലോ .

           ഇപ്പോഴത്തെ പട്ടിപിടുത്തക്കാർ തെരുവിൽ നിന്ന് പട്ടിയെയൊക്കെ വലയിലാക്കി പിടിച്ച് വണ്ടിയിൽ കൊണ്ടുപോയി വന്ധ്യംകരിച്ച് തിരിച്ച് തെരുവിൽ കൊണ്ടുവന്നു വിടുന്നു.നായ്ക്കൊന്നിനും വൃക്ഷണമില്ല.
പെൺപട്ടികളെ എന്തു ചെയ്യുമെന്നറിയില്ല. കോപ്പർ ടി എന്തെങ്കിലും ഇടുമോ .... അറിയില്ല.
  ആൺ നായ്ക്കളെയെല്ലാം വന്ധ്യംകരിച്ചപ്പോൾ പെൺനായ്ക്കളെ ഒന്നും ചെയ്യേണ്ട കാര്യമില്ലല്ലോ അല്ലേ...

കേരളത്തിലെ ആൺ നായ്ക്കളെയെല്ലാം വന്ധ്യം കരിക്കുന്നതോടെ പത്ത് കൊല്ലത്തിനുള്ളിൽ തെരുവ് നായ് പ്രശ്നം പൂർണ്ണമായും പരിഹരിക്കുമെന്ന് തന്നെ ഉറപ്പിക്കാം. ഒരു നായയേയും കൊല്ലാതെ.

✍️Maju.

💥🐕🐕🐕🐕🐕🐕🐕🏵️🌸🌺💞🐕🐕🐕🐕💥