അനുഭവങ്ങൾ പാളിച്ചകൾ ,സ്മരണകൾ-30

ഞാൻ എട്ടാം ക്ലാസിൽ പഠിക്കുമ്പോഴുള്ള ഒരു സംഭവം ഓർമ്മ വരികയാണ്.SFI യുടെ പാനലിൽ മത്സരിച്ച് ക്ലാസ് ലീഡറായിരിക്കുകയാണ്.ലീഡറാണ് ചോക്ക് എടുത്തു കൊണ്ടുവരേണ്ടതും ക്ലാസിൽ ടീച്ചർ ഇല്ലാത്തപ്പോൾ സംസാരിക്കുന്ന കുട്ടികളുടെ പേര് എഴുതി വയ്ക്കേണ്ടതും.
       ഒരു ദിവസം ലാസ്റ്റ് പിരീയഡ് രചനാ പുസ്തകം കെട്ടി സ്റ്റാഫ് റൂമിൽ കൊണ്ട് വയ്ക്കാൻ ചെന്നപ്പോൾ സ്റ്റാഫ് റൂമിന് മുൻവശത്ത് നിറയെ ആൺകുട്ടികൾ കൂടി നിൽക്കുന്നുണ്ടായിരുന്നു. അവരുടെ ഇടയിൽ കൂടി കയറി ഞാൻ രചനാ പുസ്തകം ടീച്ചറുടെ മേശപ്പുറത്ത് വച്ച് തിരിച്ചിറങ്ങുമ്പോൾ കൂടി നിൽക്കുന്ന ആൺകുട്ടികളുടെ തുടയിൽ പട പട അടി വീണു കൊണ്ടിരുന്നു.കൊമ്പൻ മീശയൊക്കെ വച്ച അദ്ദേഹം യു.പി.ക്ലാസിലാണ് പഠിപ്പിച്ചിരുന്നത് എന്നാണ് എൻ്റെ ഓർമ്മ. എന്നെ അദ്ദേഹം പഠിപ്പിച്ചിട്ടില്ല. രാവിലെ 9 മണിക്ക് സ്കൂളിലെത്തുന്ന അദ്ദേഹം എല്ലാ ക്ലാസിനു മുമ്പിലൂടെയും റോന്ത് ചുറ്റുകയും വിക്രസ് കാണിക്കുന്നവരെ ചൂരലുകൊണ്ട് പെടക്കുകയും ചെയ്യും.
     കുട്ടികളൊക്കെ സ്റ്റാഫ് റൂമിനു മുന്നിൽ നിന്ന് വിരണ്ടോടി. ഞാൻ രചനാ പുസ്തകം വച്ച് സമാധാനത്തിൽ പതുക്കെ പുറത്തേക്കിറങ്ങി നടക്കുമ്പോൾ എൻ്റെ തുടയിലും വീണു ചൂരൽ.ഞാൻ നിന്നടുത്ത് നിന്ന് തന്നെ തിരിഞ്ഞു നിന്നു. ഇതെന്താ എന്നെ തല്ലിയത് എന്ന് മനസിൽ വിചാരിച്ച് വീണ്ടും നടന്ന് ക്ലാസിൽ എത്തി.സ്കൂൾ വിട്ടു. വീട്ടിൽ എത്തി.തുടയിലെ അടിയുടെ പാട് ചുവന്ന് തടിച്ചിരുന്നു. എനിക്ക് സങ്കടം വന്നു.ഞാൻ അച്ഛനോട് വിവരം പറഞ്ഞു.
"നീ നാളെ ഹെഡ്മിസ്ട്രസിനോട് " വിവരം പറയാൻ പറഞ്ഞു അച്ഛൻ.
     പിറ്റേ ദിവസം രാവിലെ സ്കൂളിൽ ചെന്നതും ഞാൻ ഹെഡ്മിസ്ട്രസിൻ്റെ ഓഫീസ് മുറിയിൽ കയറി കാര്യം ധരിപ്പിച്ചു. അവർ മൂളി കേട്ടു. സാർ അങ്ങനെ തല്ലില്ലല്ലോ എന്നും പറഞ്ഞു.ഈ സമയം എൻ്റെ ക്ലാസ് ടീച്ചർ ഒപ്പിടാൻ അവിടെ എത്തിയിരുന്നു. ഞാൻ ഹെഡ്മിസ്ട്രസിൻ്റെ മറുപടി കേട്ട് ഒന്നും മിണ്ടാതെ ഇറങ്ങി പോന്നു.
    ക്ലാസിൽ ക്ലാസ് ടീച്ചർ വന്നപ്പോൾ പിന്നെയും കിട്ടി: "ഞങ്ങൾ വരെ ഹെഡ്മിസ്ട്രസിൻ്റെ മുന്നിൽ നിന്ന് അങ്ങനെ പറയാൻ ധൈര്യം കാണിച്ചിട്ടില്ല "എന്നു പറഞ്ഞു. അതിനും ഞാൻ മറുപടി ഒന്നും പറഞ്ഞില്ല. അതിന് ഞാൻ എന്താണ് പറഞ്ഞത്: "എന്നെ സാറ് ഒരു കാര്യവുമില്ലാതെ തല്ലി" എന്ന് വിനയ പുരസരം എൻ്റെ അച്ഛൻ പറഞ്ഞതനുസരിച്ച് പറഞ്ഞു. അല്ലാതെ ഇതിൽ പ്രത്യേകിച്ചൊന്നും ഇല്ല.
    പിൽക്കാലത്ത് ഞാൻ അധ്യാപകനായി ജോലി ചെയ്യുമ്പോൾ ആറാം ക്ലാസിൽ പഠിപ്പിക്കുമ്പോൾ ക്ലാസിൽ കുട്ടികൾ പന്ത് കൊണ്ടുവന്ന് പഠിപ്പിക്കുമ്പോൾ അതും പിടിച്ചിരുന്ന് തിരിപ്പിക്കുന്നത് കണ്ട് ആ പന്ത് ഞാൻ വാങ്ങി മേശപ്പുറത്ത് വെച്ചു. സാധാരണ ഗതിയിൽ ഇങ്ങനെ എന്തെങ്കിലും മേടിച്ച് വച്ചാൽ ക്ലാസ് കഴിയുമ്പോൾ കൊടുക്കുകയാണ് പതിവ്. രണ്ടാമത്തെ പിരീയ ഡാണ് സംഭവം.ഞാൻ ബോർഡിൽ എഴുതുന്ന സമയത്ത് ഒരു വിദ്വാൻ പന്ത് അടിച്ചുമാറ്റി. പന്ത് ആരാണ് എടുത്തതെന്ന് പറഞ്ഞില്ലെങ്കിൽ എല്ലാവർക്കും അടി കിട്ടും എന്ന്  ഞാൻ വിരട്ടി. അപ്പോൾ ഒരു കുട്ടി വേറൊരു കുട്ടിയുടെ പേര് പറഞ്ഞു. അവൻ്റെ കയ്യിൽ ഒരു അടി കൊടുത്തു.എന്നിട്ടും പന്ത് കിട്ടിയില്ല. ഞാനല്ല എടുത്തതെന്ന് അവനും. അതവിടെ അവസാനിച്ചു. ഞാൻ ക്ലാസ് തുടർന്നു.
     11:30 ൻ്റെ ഇടവേള ബെല്ലടിച്ചതും ഞാൻ ക്ലാസിൽ നിന്നിറങ്ങി സഹപ്രവർത്തകരുമായി സംസാരിച്ചു നീങ്ങുമ്പോൾ അപ്പോൾ ഞാൻ അടിച്ച കുട്ടി ഹെഡ്മാസ്റ്ററെ കണ്ട് പരാതി ബോധിപ്പിക്കാൻ പോയിരിക്കുകയാണെന്ന് മറ്റു ചില കുട്ടികൾ എനിക്ക് വിവരം തന്നു.
      ഞങ്ങൾ സ്റ്റാഫ് റൂമിൽ നടന്നു ചെന്ന് ഞങ്ങളുടെ സ്ഥലങ്ങളിൽ ഇരുന്നപ്പോഴും ഹെഡ്മാസ്റ്റർ കുട്ടി പറഞ്ഞ പരാതി എന്നോട് പറഞ്ഞില്ല.
ആ കുട്ടി ഹെഡ്മാഷിൻ്റെ മുറിയിൽ നിന്ന് (അത് ഞങ്ങളുടെ സ്റ്റാഫ് റൂം കൂടി ആയിരുന്നു) ഇറങ്ങി പോകുന്നത് ഞാൻ കണ്ടിരുന്നു. പോരാത്തതിന് മറ്റ് കുട്ടികൾ മുന്നറിവ് തന്നിരുന്നല്ലോ. ഞാൻ വിഷയം അങ്ങോട്ടു പറഞ്ഞു. അപ്പോൾ മാഷ് പറഞ്ഞു: ''ഓടടാ എന്നു പറഞ്ഞ് " ഞാൻ അവനെ ഓടിച്ചു എന്ന് ചിരിച്ചു കൊണ്ട് പറഞ്ഞു.
     അപ്പോൾ പഴയ സംഭവമാണ് എനിക്ക് ഓർമ്മ വന്നത്. ഇടവേളകഴിഞ്ഞ് ബെല്ലടിച്ചു. അവൻ വികൃതി ആയിരുന്നു. പക്ഷേ അവനല്ല അത് എടുത്തത്, അതുകൊണ്ടാവണം അവൻപരാതിയുമായി എത്തിയതെന്ന് ഞാൻ ഊഹിച്ചു. ഞാൻ നേരെ അവൻ്റെയടുത്തെത്തി. നീ അല്ല പന്തെടുത്തതെങ്കിൽ നിന്നെ അടിച്ചത് തെറ്റായിപ്പോയി എന്ന് പറഞ്ഞ് അവനെ ചേർത്തുനിർത്തി. അപ്പോൾ അവന് വളരെ സന്തോഷമായി.
   നിരപരാധികളായവർ ശിക്ഷിക്കപ്പെടുമ്പോൾ അവർക്കുണ്ടാവുന്ന വേദന എൻ്റെ അനുഭവത്തിൽ നിന്ന് മറ്റുള്ളവർക്കും ഉണ്ടാവാതിരിക്കാൻ ഞാൻ കരുതൽ എടുക്കാറുണ്ട്.ഒരു നിരപരാധിയും ശിക്ഷിക്കപ്പെടാതിരിക്കട്ടെ.

                       (തുടരും)

✍️മജു.

🥇🥇🥇🥇🥇🥇🥇🥇🥇