അച്ഛന് പ്രണാമം🙏

 ഇന്ന് അച്ഛൻ്റെ ഓർമ്മയ്ക്ക് മുന്നിൽ ബലി ഇടുന്ന ദിവസമായിരുന്നു. ഒരു ക്രിസ്മസ് തലേന്ന് ഡിസംബർ 24 നായിരുന്നു അച്ഛൻ്റെ മരണം.

നാള് നോക്കിയാണല്ലോ ബലി ഇടുന്നത്. നാള് നോക്കാൻ തുടങ്ങുന്നതിന് മുൻപ് അമ്മയുടെ കോൾ എത്തും.

ഡിസംബർ 22 ന് അമ്മ വിളിച്ചു. ബലി ഇടേണ്ടത് ഡിസംബർ 28നാണ്, 27 ന് ഒരിക്കൽ എടുക്കണം എന്നു പറഞ്ഞ്.

 അച്ഛനും അമ്മയും വളരെ സ്നേഹത്തോടെ ജീവിച്ചവരായിരുന്നു. വല്ലപ്പോഴും ഏതെങ്കിലും കാര്യത്തിന് അച്ഛൻ ദേഷ്യപെട്ടാലും അമ്മ മൗനം പാലിക്കാറെ ഉണ്ടായിരുന്നുള്ളൂ. മറുത്തൊന്നും പറഞ്ഞു കേട്ടിട്ടില്ല. അങ്ങനെ അമ്മയോട് ദേഷ്യപ്പെട്ടു കണ്ടിട്ടുമില്ല.

അച്ഛൻ്റെ ആണ്ടിന് ബലി ഇടണ ദിവസം ഞങ്ങൾ മറന്നാലോ വിചാരിച്ച് മുമ്പേ അമ്മ ഓർമ്മിപ്പിക്കും.

 ഞങ്ങളുടെ പിറന്നാളും പേരക്കുട്ടികളുടെ പിറന്നാളും അമ്മയ്ക്ക് കാണാപ്പാഠം.

 പേരക്കുട്ടികളുടെ ജൻമദിനത്തിന് ഉടുപ്പുകൾ എത്തിയിരിക്കും.

  എൻ്റെ ഭാര്യ മകളെ പ്രസവിച്ചതിനു ശേഷം അഞ്ച് വീടുകൾ വാടകയ്ക്ക് മാറി താമസിച്ചതിനു ശേഷമാണ് എനിക്ക് വീടുപണി പൂർത്തിയാക്കാൻ കഴിഞ്ഞത്. എനിക്ക് സ്വന്തമായി ഒരു ചെറിയ വീടും സ്ഥലവും ഉണ്ടായിരുന്നപ്പോഴാണ് ഈ വാടക വീട് മാറി സഞ്ചാരം, കാരണം വേറൊന്നുമല്ല, ഭാര്യ ജോലി ചെയ്യുന്ന സ്ഥാപനത്തിനടുത്തായാൽ ഫീഡിങ്ങും നടത്താൻ സൗകര്യമാകുമല്ലോ എന്നു കരുതി.

പുതിയതായി വാങ്ങിയ സ്ഥലത്ത് വീട് പണിതു താമസമായി, ഏറെ പിന്തുണയും അച്ഛനിൽ നിന്നും ഉണ്ടായി. എന്നോടൊപ്പം കുറച്ചു കാലം താമസിക്കണം എന്നും അച്ഛൻ ആഗ്രഹിച്ചിരുന്നു. ഇവിടെ കുറച്ചു കാലം താമസിക്കാമെന്ന് പറഞ്ഞപ്പോൾ പിന്നെയാകട്ടെ എന്നാണ് പറഞ്ഞത്. പിന്നെ അത് നടന്നില്ല. 

അച്ഛൻ എൻ്റെ അരികിൽ ഉണ്ടായിരുന്നെങ്കിൽ എന്ന് ഓർത്തു പോകുന്ന നിമിഷങ്ങൾ.....

ഞങ്ങൾ മക്കളുടേയും പേരക്കുട്ടികളുടേയും നാളുകൾ ഓർത്ത് വച്ച് പുഷ്പാജ്ഞലിയും പായസവും കഴിക്കുന്ന അമ്മ. പൂർവ്വിക സ്വത്തായി കിട്ടിയതിൽ18 സെൻ്റ് സ്ഥലം അമ്മ കുടുംബക്ഷേത്രത്തിന് ദാനമായി നൽകി. വലതു കയ്യ് കൊണ്ട് നൽകിയത് ഇടത് കയ്യ് അറിയരുത് എന്നാണല്ലോ.... എന്നാലും അമ്മയുടേയും ജ്യേഷ്ഠൻ്റെയും വലിയ മനസ് കാണാതെ വയ്യ....

 സ്നേഹങ്ങൾക്കും ബന്ധങ്ങൾക്കും വില കുറയുന്ന ഈ കാലത്ത് സ്നേഹ ബന്ധങ്ങൾ മറ്റെന്തിനേക്കാളും ഉപരിയായി നിലനിർത്തണം.

എൻ്റെ അച്ഛൻ്റെ ആത്മാവിന് ആത്മശാന്തി നേരുന്നു. എന്നോടൊപ്പം സദാ അച്ഛനുണ്ടെന്നും ആ അനുഗ്രഹമാണ് എന്നെ മുന്നോട്ട് നയിക്കുന്നതെന്നും ഞാൻ കരുതുന്നു.

ത്യാഗമൊന്നതേ നേട്ടം..

താഴ്മ താനഭ്യുന്നതി....

നൻമകൾ നേരുന്നു

✍️M@ju